Изминува една година од трагедијата во Кочани, настанот кој предизвика длабока болка и трајна трага во колективната меморија на нашето општество. Со поминување на времето болката не престанува. Таа се трансформира, но останува дел од личната и заедничката реалност.
Како стручна заедница, потсетуваме дека последиците од вакви трагични настани и после една година, може да остават траги во психофизичкото функционирање на личноста. Тие можат да се манифестираат како долготрајна тага, траума, анксиозност, нарушено чувство на безбедност и други симптоми.
Годишнините често повторно ги активираат истите чувства кај преживеаните, семејствата, сведоците и целата заедница.
Во вакви периоди е особено важно:
- да се валидира болката,
- да се обезбеди достапна и континуирана психолошка поддршка
- да се негува солидарност и емпатија, и
- системски да се вложува во безбедност, превенција и одговорно постапување на институциите.
Нашите лиценцирани психолози од Комората на психолози остануваат достапни за стручна психолошка поддршка и помош за намалување на психолошките потешкотии во функционирањето на личноста.